الثلاثاء: 21 نوفمبر، 2017 - 02 ربيع الأول 1439 - 02:33 صباحاً
اقلام
الأحد: 12 نوفمبر، 2017

* حجي منخي؟

⁃ گول زاير مشكور.. ⁃

* أبو يسر صاحبك، يدبرها يكظ هالحيتان الباگت العراق، ويذبهم بالسجون، ويصادر أموالهم المنقوله وغير المنقوله؟!

⁃ وليش ما يدبرها؟ شني.. عايز إيدين، رجلين، دماغ، شرطه، جيش، قانون، مخابرات؟!

* ويكظهم هيچ كلهم، ويذبهم بالسجن، ويلبسونهم برتقالي، ويطلعونهم بالملون؟

⁃ وحات أبوك، إذا خلوه صريوط وگريوط يشتغل براحته، يكظ شكو واحد باگ دينار ويطگه كلبچه، ويترس بيهم مراكز الشرطه..

* چا ما يحطهم بشيراتون مثل إبن سعود؟!

⁃ هم ذوله المهتلفين مال شيراتونات، حراميه، لا خلّوا نفط، لا مساعدات، لا مقاولات ما باگوها، وكلهم عدهم مصارف، ويشتغلون بغسيل الأموال..

* غسيل الأموال هذا شنو أنوب، أنا سامع غسل وكوي، غسل وتشحيم، غسلة الجنابة، غسل فلوس ما سامع!

⁃ كاتلتك غسلة الجنابة!

* ويني وين الجنابة يا حجي، شياب ورجلينه بالگبر!

⁃ إحچْْ عن روحك، آنا موش شايب، ولا عايب!

* أوووو .. سولفلنه على غسل الفلوس هذا شنو؟ وشنو تاريخه؟

⁃ بس تسكت.. حتى تسمع ..حتى تفهم!

* صار.. بس أريد تصلصللي السالفه تصلصل!

⁃ شوف يا زاير: گبل ..چانت هاي العصابات مالت المخدرات، تبيع من واحد لواحد، منا لمن توصل للمدمن.

* أَهْ

⁃ المدمن يشتريله وصله زغيره يطلعوها اله من النايلون، ويحطوها بيده، وهو يطيهم فلوسها..

* خوش

– والبايع والمشتري تصير ريحة المخدرات بيديهم وبالفلوس، شلون ريحة فلوس السمّاچه!

* نعم

⁃ من ترد تنجمع الفلوس كلها من البياعه لرئيس العصابة، توصلّه وريحتها كلها ريحة مخدرات..

* خوش

⁃ فرئيس العصابه يغسل الفلوس لو بالتبخير لو بمواد تشيل ريحة المخدرات حتى من يوديها للمصرف ما ينكشف سرّه.. إفتهمت هسه!

* وجماعتنه شني يبيعون مخدرات ؟!

⁃ موش گتلك تسكت وبس تسمع؟!

* سكتت!

⁃ هاي أصل التسمية، بس هسه محد يغسل الفلوس، هسه اكو شي اسمه: تبييض الفلوس؟

* وشنو هذا انوب؟!

⁃ الفلوس السوده الحرام، يگلبونها مية گلبه حتى يسوونها فلوس بيضه شرعية قانونية!

افتهمت هسه، بس ظلت شغله!

* شني هيّه؟

⁃ سريوط وگريوط ياهم؟

* لا تسمعنا حجيه كواغد، خوّانها كلهم يشتغلون وياهم!

⁃ نسكت؟!

* إي سكته!

⁃ إششش

في أمان الله